Motshekga vaar uit oor seks

2012-11-08 18:00

Bloemfontein – Angie Motshekga, minister van basiese onderwys, het aan ouers in die Noord-Kaap gesê hul kinders se sekslewe is nie die departement se probleem nie, berig The Times.

Motshekga het in 'n lesing oor ouerpligte en -regte aan ouers in De Aar gesê hulle kan nie die departement die skuld gee wanneer hulle kinders swanger word of dwelms misbruik nie.

"Tienerswangerskap is 'n probleem wat deur huise en die gemeenskap by skole ingebring word, maar dit is 'n departementele probleem," het sy gesê.

"Hulle [het] nie seks in skole nie, hulle [het] seks by die huise. Dit is 'n probleem. Daar is iets fout as die probleem myne geword het. Ons verskaf nie beddens nie; ons verskaf penne en boeke."

'n Studie wat deur Statistieke Suid-Afrika gedoen is, het vanjaar getoon dat 160 754 skoolmeisies tussen Julie 2008 en Julie 2010 swanger geword het.

Volgens die berig volg Motshekga se uitlatings nadat ouers 'n beroep op haar gedoen het vir beter seksonderrig in skole.
      
– Volg Nuus24 op Twitter

- SAPA