Motorwagte, paramedici red meisie (4)
2012-01-09 07:00
Welkom – Die flink optrede van twee motorwagte en ’n Welkomse paramedikus is waarskynlik die enigste rede waarom ’n vierjarige meisie, wat Saterdagmiddag hier in die bloedige son in ’n motor by ’n winkelsentrum toegesluit was, nog leef.
Die kind was langer as ’n uur in die Volkswagen Polo op die parkeerterrein van Goldfields Mall voordat sy deur Annali Snoer, paramedikus van Netcare911, uit die motor gered is. Snoer het die een agterruit van die motor met ’n suurstofsilinder uitgeslaan om die kind uit te haal.
Morné Nagel en Abel Modemoeng, motorwagte, het omstreeks 14:30 gaan kyk wat aangaan toe die motor se alarm afgaan. Hulle het op die kind in die motor, waarvan die vensters heeltemal toe was, afgekom.
Hulle het die polisie en ambulans ontbied.
Die een klein agterruit is eers uitgeslaan, maar sonder die sleutels kon die motordeure nie ontsluit word nie. ’n Nat ambulanslaken en water is deur die klein venster vir die kind aangegee, maar sy het vinnig verswak.
Snoer het die groter ruit met die suurstofsilinder uitgeslaan. Sy sê toe sy haar hand deur die klein ruit in die motor gesteek het om vir die kind die water te gee, het dit gevoel of sy haar hand in ’n oond druk. Die temperatuur buite was steeds in die hoë dertigs, en in die toe motor veel hoër.
Die sentrum se sekuriteit het drie keer in sowel die winkels as die aangrensende casino oor die interkomstelsel na die eienaar van die motor gesoek.
Twee jong mans, wat gaan skoene koop het, het omstreeks 16:15, amper twee uur later, doodluiters daar aangekom.
Hulle het ontken dat hulle die motor bestuur het en het gesê die eienaar daarvan het weggehardloop. Hulle is albei op ’n aanklag van kinderverwaarlosing in hegtenis geneem.
Die kind se ma, Mananna Makole (23), is ontbied. By haar aankoms daar het sy gesê die twee mans het die kind sonder haar toestemming met hulle laat saamry.
Die kind is deur Snoer en haar kollega in die ambulans gestabiliseer en is buite gevaar.
’n Dobbelverslaafde ouerpaar van Welkom, wat op 15 November 2008 hul vyf maande oue baba in ’n motor voor dieselfde casino gelos het, is ná die voorval by die dobbelraad aangemeld en is gevolglik verbied om ooit weer in ’n casino in Suid-Afrika te dobbel.
Hulle is ook elk gevonnistot R5 000 of vyf jaar tronkstraf wat voorwaardelik vir vyf jaar opgeskort is.
Volg Nuus24 op Twitter
- Volksblad