Motoris vas ná tref-en-trap
2012-01-06 17:02
Durban – ‘n Bestuurder is in Pietermaritzburg in hegtenis geneem nadat hy ‘n ongeluk veroorsaak het en weggery het, het die polisie in KwaZulu-Natal gesê.
Kol. Jay Naicker sê twee fietsryers is in die ongeluk beseer.
Hy sê die 21-jarige man is Donderdag in New Holmes, Pietermaritzburg, vir roekelose- en nalatige bestuur in hegtenis geneem. Die verdagte is ook in die sop aangesien hy daarin misluk het om ná die ongeluk stil te hou.
Daar word beweer dat die motoris Donderdagoggend die fietsryers op die M13 in Fields Hill naby Kloof, Pinetown, raakgery het.
Naicker sê die man het die ongeluk by die Hillcrest-polisiestasie aangemeld, maar die verdagte het die ongeluk as ‘n klein voorval beskryf.
Volgens Naicker is een van die fietsryers – ‘n 28-jarige vrou – in ‘n ernstige toestand met kopbeserings in die hospitaal. Haar metgesel – ‘n 62-jarige man – is kort ná die ongeluk ontslaan.
Die verdagte is vasgekeer nadat sy voertuig se nommerplaat op die ongelukstoneel gevind is.
“Die bestuurder se voertuig is met skade aan die voorkant, windskerm en dak op die eiendom van ‘n paneelklopper gevind,” het Naicker vertel.
Die man sal later in die Pinetown-landdroshof verskyn.
Volg Nuus24 op Twitter
- SAPA