Motoris sluit dronk polisieman toe
2013-01-17 15:34
Johannesburg – ‘n Motoris het ‘n dronk polisiebeampte agter in sy eie vangwa in KwaZulu-Natal toegesluit, het ‘n koerant Donderdag berig.
Beeld berig Russell George van Prestbury, Pietermaritzburg, het Woensdag gesê hy het Sondag omstreeks 20:00 ’n polisievangwa heen en weer sien jaag.
“Die voertuig het in Victoriaweg afgedraai en teen die aankomende verkeer begin inry. Hy het in ’n stadium skielik stilgehou. Ek het uit my motor geklim en hom gevra wat hy doen.”
Die polisieman, wie se naam nie bekend is nie, het weggejaag. George het hom agternagesit.
Toe die polisieman weer skielik rem en stilhou, het die motoris ook stilgehou en 10111 geskakel.
“Ek kon ruik hy het gedrink. Hy wou nie uitklim nie en toe haal ek sy sleutel uit die aansitter.”
George het die polisieman uit die voertuig getrek, agterin die vangwa gesit en dit gesluit.
Volgens ’n ooggetuie, Khanyi Mnikathi, het die polisieman gesê dit is sy verjaardag en sy vriende het elkeen vir hom ’n bottel drank gebring.
“Hy het begin huil,” het die ooggetuie gesê.
Joey Jeevan, polisiewoordvoerder, het bevestig dat die polisieman in hegtenis geneem is.
Volg Nuus24 op Twitter
- SAPA
