Man dood ná grypdiewe hom op N1 aanval

2013-03-08 07:05

Johannesburg – 'n Man is dood nadat hy grypdiewe op die N1 agternagesit en met 'n klip op die kop geslaan is, het die polisie gesê.

Tabit Samodien het op sy selfoon gepraat toe hy op die N1 by die Gordonweg-afrit in Roodepoort, wes van Johannesburg, gery het. Die bestuurskant se venster was afgedraai, berig Eyewitness News. Toe die motor tot stilstand kom, het 'n man sy selfoon gegryp en weggehardloop.

Samodien het uit sy voertuig geklim en die verdagtes agterna gesit. Sy vrou van minder as drie maande, wat saam met hom in die motor was, het toe die polisie gebel.

Lydia Mtila-Dikolomela, polisiewoordvoerder, het gesê twee ander verdagtes het Samodien agternagesit en hom aangeval.

"Die slagoffer het halfnaak langs die pad gelê. Hy het ernstige rug en kopbeserings opgedoen en daar is klippe langs sy lyk gevind."

Die polisie ondersoek 'n saak van moord. Niemand is nog in hegtenis geneem nie.

– Volg Nuus24 op Twitter