Twee klim self uit verwronge wrak

2013-01-08 13:11

Johannesburg – Twee mense het wonderwaarlik oorleef nadat hul voertuig op die R102 naby Durban se King Shaka- internasionale lughawe omgeslaan het, het paramedici gesê.

Chris Botha van Netcare 911 het in 'n verklaring gesê die erg verwronge oorblyfsels van die motor het in die pad gelê toe paramedici by die toneel opgedaag het.

Hy sê reddingswerkers was verbaas dat die insittendes in ‘n stabiele toestand langs die snelweg gesit het.

Die pasiënte is op die toneel behandel en na die Netcare Umhlanga Hospitaal vir verdere mediese sorg geneem.

Volgens die woordvoerder is die oorsaak van die ongeluk nog onbekend. Polisiebeamptes sal die ondersoek verder voer.

Volg Nuus24 op Twitter

- Nuus24