Motor twee keer op een dag gesteel
2010-11-11 13:06
Beeld
Johannesburg - Die motor van ’n vrou van Elsburg aan die Oos-Rand is twee keer op een dag gesteel – die tweede keer van ’n polisiekantoor se perseel af.
Elize Kruger (60) het haar kleindogter, Jauné Kruger (16), Maandag by die Hoërskool Elsburg gaan oplaai en daarna by Pick n Pay in Lambton stilgehou om inkopies te doen.
Toe hulle omstreeks 14:30 op die parkeerterrein kom, was die metaalblou Ford Laser skoonveld. Kruger het haar Tracker-stelsel onmiddellik laat aktiveer.
“Die mense van Tracker het gesê dat ek die saak dadelik by die polisie moet aangee,” het Kruger gesê.
Tracker-beamptes het die gebied intussen vanuit ’n helikopter begin fynkam.
Kruger en haar suster, Leonie Wahl, is na die Elsburg-polisiekantoor, maar is aangesê om die saak by die Germiston-polisie aan te meld.
Terwyl die twee vroue by die Germiston-polisiekantoor tougestaan het, het Kruger ’n oproep van Tracker ontvang.
“Hulle het gesê hulle het my kar ná 45 minute in Katlehong opgespoor en aangesien daar nie veel skade was nie, kon die metropolisie die motortjie na die polisiekantoor toe bring.”
Kruger wou haar motor dadelik huis toe neem, maar ’n lid van die Germiston-polisie het gesê die persoon wat die klaringsertifikaat moet teken, is nie op kantoor nie en dit moes oornag by die polisiekantoor bly.
“Ek is aangesê om die motor naby die ingang van die polisiekantoor te parkeer en dit die volgende oggend 08:00 te kom haal.”
Dinsdag was sy op die kop 08:00 daar.
Nadat sy al die nodige vorms ingevul het en die klaringsbewys geteken is, het sy saam met ’n konstabel na die parkeerterrein gegaan.
“Toe ons by (parkeerplek) 3D kom, sê die konstabel vir my: ‘But where is the car?’”
Die voertuig was skoonveld, al het private veiligheidswagte by die hek diens gedoen.
Kruger het Tracker weer geskakel, maar dié keer was daar geen sein nie en sy vermoed die opsporingtoestel is uit die motor verwyder. Sy is terug na die stasie en het ’n verduideliking gevra. “Almal was geskok en verbaas en ek moes weer ’n saak begin.”
Brig. Johan Oosthuizen, bevelvoerder van die Germiston-polisiekantoor, het gesê hulle is besig om die tweede saak te ondersoek en het geen idee wat kon gebeur het nie. “Dit is baie snaaks dat die voertuig kon verdwyn terwyl daar sekuriteit by die hekke was.
“Dit is ook ’n groot verleentheid vir die stasie,” het hy gesê.
- Beeld