Motlanthe vra vir eenheid

2012-12-21 07:32

Kaapstad – President Jacob Zuma sê die ANC het onderneem om armoede en werkloosheid in die volgende vyf jaar te oorkom, het RSG Vrydag berig.

Zuma het dié onderneming gemaak tydens sy afsluitingsboodskap by die ANC se verkiesingskonferensie in Mangaung.

Hy het sê die nasionale ontwikkelingsplan is 'n belangrike grondslag om 'n voorspoedige land te bou.

Zuma het voorts ook aangekondig dat adjunk-president Kgalema Motlanthe in die toekoms die hoof van die party se opleidingsprogram sal wees.

Afgevaardigdes het op dié aankondiging Zuma luid toegejuig.

Hy het ook kommentaar gelewer op die gesondheid van oudpresident Nelson Mandela en gesê die hele land hoop dat Madiba beter sal word.

Motlanthe het by die afsluiting van die konferensie gesê verkiesings moet die party versterk en nié verdeel nie.

Zuma se ondersteuners het in die verkiesing van die nasionale uitvoerende komitee oorheers, terwyl diegene wat voorstanders was van leierskapverandering groot verliese gely het.

Motlanthe sê alle lede moet die nuutverkose leierskap steun. Hy sê hyself het sy nederlaag aanvaar en daar moet nou getoon word dat die ANC ware demokrate is.

Volg Nuus24 op Twitter.

– RSG