Motlanthe nie betrokke by Iran-transaksie – OB
2012-09-28 18:34
Johannesburg – Die openbare beskermer, Thuli Madonsela, het bevind dat adjunk-president Kgalema Motlanthe en sy lewensmaat nie op 'n onbehoorlike wyse betrokke was by ‘n transaksie met Iran nie.
“Motlanthe was nooit daarby betrokke om 360 Aviation te help om die Suid-Afrikaanse regering se ondersteuning te kry vir die saketransaksie waarby die Islamitiese Republiek van Iran betrokke was nie,” het Madonsela se verslag, wat Vrydag vrygestel is, gelui.
Motlanthe het die openbare beskermer gevra om ondersoek in te stel ná ‘n berig in die Sunday Times wat op 11 Maart 2012 gepubliseer was.
Die berig het beweer dat Motlanthe se lewensmaat, Gugu Mtshali, “betrokke was in die verkryging van R104 miljoen se omkoopgeld om ‘n ooreenkoms, wat sanksies sou oortree, met Iran te kry”.
Die berig sê Mtshali het in Februarie 2011 by ‘n restaurant in Bryanston, Johannesburg, met vennote van Motlanthe en verteenwoordigers van 360 Aviation ontmoet “om te gesels oor die koop van die regering se ondersteuning” aan 360 Aviation.
Die maatskappy het glo beplan om handel te dryf met vliegtuie in Iran. Gedurende die tyd was daar sanksies teen Iran wat deur die Verenigde Nasies ingestel was. ‘n Embargo op die verkoop van wapens was daarby ingesluit.
Die openbare beskermer sê Mtshali het ‘n gedeelte van daardie vergadering bygewoon en het slegs gesê: “Nee... Hei man Jo, komaan Jo...”
“Mej Mtshali se teenwoordigheid en die uitlating van die bogenoemde paar woorde staaf nie ‘n bevinding dat sy deelgeneem het aan die vergadering of die transaksie met Iran nie. Ook nie dat sy omkoopgeld verkry of ontvang het in ruil daarvoor om die regering van Suid-Afrika te beïnvloed om 360 Aviation se saketransaksie met Iran te ondersteun nie,” het die beskermer gevind.
– Volg Nuus24 op Twitter
- SAPA
