Motata wil weer as regter dien
2011-11-24 14:11
Pretoria – Regter Nkola Motata, wat hangende 'n tugondersoek op spesiale verlof geplaas is nadat hy op aanklag van dronkbestuur skuldig bevind is, wil weer as regter optree.
Motata het vandeesweek 'n hofaansoek ingedien waarin hy die hof se toestemming versoek om weer as regter op te tree, het AfriForum in 'n verklaring gesê.
Hofstukke is die week by AfriForum, die minister van justisie en die Regterlike Dienskommissie afgelewer.
Motata beweeer in sy hofaansoek dat dit onbillik is dat hy van die reg ontneem word om as regter op te tree. Hy versoek die Noord-Gautengse hooggeregshof om 'n bevel uit te reik waarvolgens hy toegelaat word om weer as regter op te tree.
Motata het in Januarie 2007 sy Jaguar deur die muur van Richard Baird, 'n sakeman, se huis in Hurlingham, Randburg geploeg.
Hy is in 2009 in die Johannesburgse hooggeregshof skuldig bevind op aanklag van dronkbestuur en 'n boete van R20 000 of 12 maande tronkstraf opgelê.
AfriForum sal Motata se hofaansoek teenstaan.
– Volg Nuus24 op Twitter
- Nuus24