Moslem-moord: Aanklag teen man laat vaar

2012-11-29 13:49

Johannesburg – Aanklagte teen ‘n man wat na bewering ‘n Moslem aangerand het, is in die Krugersdorp-streekhof teruggetrek.

“Ek is verlig,” het Zayne van Tonder aan verslaggewers buite die hof gesê.

Phindile Louw, woordvoerder vir die nasionale vervolgingsgesag, sê die saak teen Van Tonder (33) is teruggetrek omdat daar ‘n “tekort aan bewyse” was om hom by die voorval te betrek.

Hy is aanvanklik van aanranding aangekla en is in Augustus op borgtog van R2 000 vrygelaat.

Die saak teen sy medebeskuldigde, Roedolf Viviers, sal egter op 28 Januarie voort duur. Sy verhoor is na Johannesburg se hooggeregshof verwys.

Viviers (28) word daarvan aangekla dat hy Muhammad Fayaaz Kazi op 6 Augustus buite ‘n Chicken Licken-kitskosrestaurant in Magaliesburg doodgeslaan het.

Kazi het die mans glo gekonfronteer nadat hulle hom na bewering oor sy baard gespot en hom beledig het.

'n Geveg het toe uitgebreek, en Kazi het later aan sy beserings in die hospitaal beswyk.

Volg Nuus24 op Twitter  

- SAPA