Moordenaar vry in nuwe jaar

2012-12-12 11:39

Johannesburg – Pretoria se hooggeregshof het parool aan ‘n veroordeelde moordenaar toegestaan nadat die departement van korrektiewe dienste nie daarin kon slaag om vier maande gelede te besluit of hy vrygelaat kan word nie.

The Star berig Cornelius van Wyk sal op 1 Januarie vrygelaat word.

Die man is in 1994 drie lewenslange vonnisse opgelê nadat hy drie mense in 1991 in Makhado, Limpopo, vermoor het. Van Wyk was toe 20 jaar oud en deel van die regse Nasionale Sosialistiese Partisane.

Die departement het aanvanklik geweier om sy aansoek om parool te oorweeg. Van Wyk het egter die saak na die hof geneem, waarna die hof gelas het die departement moet die saak verder voer, ingevolge die parool-wette wat ten tyde van sy vonnisoplegging in effek was.

Die koerant berig die paroolraad het aanbeveel dat Van Wyk parool gegun moet word. Die minister van die departement van korrektiewe dienste het egter nooit die finale besluit geneem nie.

Daarna het die veroordeelde moordenaar daarop aangedring dat ‘n besluit geneem moet word.

Van Wyk se regsverteenwoordiger, Julian Knight, eis ‘n verduideliking van die minister vir waarom hy ‘n hofbevel geïgnoreer het.

Volg Nuus24 op Twitter  

- SAPA