Moordenaar ontsnap uit hospitaal
2011-04-30 23:16
Johannesburg - 'n 29-jarige Mosambiekse man wat 'n lewenslange vonnis vir moord by die Leeukop-tronk buite Johannesburg uitdien het uit die Tembisa- openbare hospitaal ontsnap.
Die departement van korrektiewe dienste het bevestig dat 'n soektog van stapel gestuur is vir Andries Gamba Msimang, wat Vrydag uit die hospitaal ontsnap het.
"Hy is op 26 April 2011 na die hospitaal geneem vir observasie en is later opgeneem nadat hy 'n beroerte gehad het," het die departement Saterdag gesê.
"Hy dien 'n lewenslange vonnis uit vir moord, roof, verkragting, en huisbraak met die opset om te roof en te ontvoer."
Msimang is op 2 September 2009 gevonnis.
Die departement van korrektiewe dienste het 'n interne ondersoek na die saak begin. Die saak is ook by die polisie aangemeld.
Die departement se waarnemende streekskommissaris vir Gauteng, Mmule Motsamai, het 'n beroep op die publiek gedoen om te help om die "gevaarlike oortreder" weer vas te trek.
"Die departement van korrektiewe dienste neem enige ontsnapping baie ernstig op en het reeds vir die twee beamptes wat verantwoordelik was om oor die gevangene wag te hou kennis gegee dat hulle geskors sal word," het die departement gesê.
"Die beamptes kan teregstaan op aanklagte van growwe nalatigheid en pligsversuim."
Lede van die publiek word aangeraai om nie te probeer om Msimang in hegtenis te neem nie, maar om 10111 te skakel of die naaste polisiestasie in kennis te stel indien hy gewaar word.
- Volg Nuus24 op Twitter.
- SAPA