Moordenaar in tronk klets op MXit, Facebook
2011-06-05 09:00
Johannesburg - ’n Lewenslange vonnis verhoed nie die veroordeelde moordenaar Johan Rosslee om op Facebook en MXit te sosialiseer nie.
Rosslee van Heidelberg, Gauteng, dien tronkstraf uit weens die moord op sy eks-verloofde, ’n vriend van haar, ’n jong ma en ’n driejarige seun.
Maar op Facebook knoop hy geselsies aan met ou skoolvriende.
Hy vra byvoorbeeld op Valerie McHattie van Balfour se muur of sy hom onthou. “(Ek het) voor jou gesit in Engels.”
Dan deel hy sommer sy selfoonnommer vir haar uit en spreek af om 19:00 die betrokke aand op MXit te gesels.
McHattie het by navraag bevestig dat sy met Rosslee gesels.
Volgens haar is hy aanvanklik in ’n tronk in Pretoria aangehou, maar is deesdae in Johannesburg.
Dit gaan baie goed met hom en hy studeer.
McHattie en Rosslee het saam atletiek gedoen by die Hoërskool Balfour.
“Ons het jare laas kontak gehad. Dis maar net nou. Hy vra maar of ek al getroud is en kinders het en so aan. Hy sê ook hy kan miskien oor so agt jaar uitkom vir goeie gedrag.”
Oor die gruweldade wat hom in die tronk laat beland het, praat hulle nie eintlik nie.
Rosslee het haar net gevra of sy daarvan weet.
“Ons almal maak foute,” sê sy.
Rosslee se foute is deur die appèlhof as “barbaars” en “baldadig” beskryf.
As 24-jarige was hy in 2003 “verpletter” toe Liz-Marie Minny (19) hom verlaat het.
Sy het by haar nuwe kêrel ingetrek en hy het haar by dié huis ingewag om haar te vermoor.
Maar haar kêrel se broer, Abrie Greyling (21), het eerste by die huis opgedaag en Rosslee het hom doodgesteek.
Heloise van der Westhuizen (23), Greyling se vriendin, sowel as haar driejarige seun, Donovan, het op die toneel afgekom en met hul lewens geboet.
Laastens is Minny vermoor, kaal uitgetrek en op ’n bed vasgemaak voordat hy ’n kruis op haar bors uitgekerf het.
Dit moes soos ’n rooftog lyk, het Rosslee gebieg.
Hy is tot effektief 18 jaar tronkstraf gevonnis, maar dié “skokkend onvanpaste” vonnis is later gewysig na 20 jaar elk vir die volwassenes en lewenslank vir die kind.
Minny is 14 keer gesteek, Donovan vier keer, Van der Westhuizen ses keer en Greyling drie keer.
Toe McHattie gevra is of Rosslee ook uitgelap het waar hy aan ’n selfoon in die tronk kom, het sy gesê sy “weet nie eintlik hoe dit werk nie”.
Sy het later teruggebel om te sê sy wil nie moeilikheid vir Rosslee veroorsaak nie.
- Rapport