Moord op miljoenêr was 'ongeluk', hoor hof
2013-01-29 10:16
Kaapstad – 'n Voormalige Ugandese kindersoldaat het aan die Wes-Kaapse hooggeregshof gesê dit was nie sy bedoeling om die Deense miljoenêr Preben Povlsen in 2008 te vermoor nie.
Francis Kimeze (38) en twee ander het Maandag in die hof verskyn nadat Povlsen op 14 Januarie in sy huis in Gordonsbaai vermoor is, berig Cape Times.
Povlsen is 50 keer gesteek, sy nek is gebreek en sy lyk is gedeeltelik verbrand.
Kimeze, wat homself verdedig, het aan die hof gesê Povlsen was woedend nadat hy hom (Kimeze) en 'n vriend betrap het toe hulle in sy motorhuis gerook het.
'n Geveg het volgens Kimeze ontstaan, waarna Povlsen 'n mes uit sy gordel geruk en hom in sy arm gesteek het.
"Ek het nie geweet hoe nie, maar in die struweling het ek groot geskrik. Ek weet nie hoe om te verduidelik nie, maar ek het kop verloor. Ek is geleer om nie met mense te baklei nie en my ma het altyd dieselfde aan my gesê, maar ek was bang," het hy gesê.
Kimeze het gesê hy het niemand vermoor sedert 1994, toe hy deel was van die Rwandese Patriotiese Front, nie. Hy is as kind ontvoer om as 'n kindersoldaat te werk.
Die saak duur Dinsdag voort.
– Volg Nuus24 op Twitter
- SAPA
