Moord-SMS kry 'n stertjie by
2010-04-27 08:43
Philip de Bruin, Die Burger
Kaapstad - Die omstrede SMS-boodskap oor ’n beweerde massamoord-aanslag op witmense Dinsdag, wat sedert dié naweek landwyd die ronde doen, het Maandag ’n stertjie bygekry.
Die SMS se jongste weergawe koppel AfriForum aan die boodskap asof dié organisasie dit uitstuur.
Kol. Vishnu Naidoo van die kommissaris, genl. Bheki Cele, se kommunikasie-afdeling, het by navraag gesê “alle bewerings word in dié stadium ondersoek”.
Nie die polisie of AfriForum kon teen Maandagmiddag een van die pamflette – waarin swart mense na bewering aangehits word om witmense vandag op Vryheidsdag te vermoor – kry nie.
Nantes Kelder, hoof van gemeenskapsveiligheid, het gister namens AfriForum die SMS en “misbruik van AfriForum se naam” ten sterkste veroordeel.
AfriForum voel só sterk oor die saak dat hy ’n beloning van R10 000 sal uitloof aan enigeen wat inligting – “wat kan lei tot die vastrek van die persoon wat die SMS-veldtog begin het” – bekend maak.
“Dié SMS’e skep ’n klimaat van vrees en chaos – dit sweep emosies op en saai paniek.”