‘Mooi horlosie!’ kos haar toe R9 000
2009-11-21 13:00
Amanda Roestoff
Johannesburg - Mense moet op hul hoede wees wanneer hulle inkopies doen, het ’n polisie-inspekteur gewaarsku nadat haar bankkaart vermoedelik in ’n winkel gedupliseer is.
Insp. Charlet de Lange (45) van die Krugersdorpse polisiekantoor se misdaadintelligensie-eenheid is verlede Sondag om middernag 15 November wakker geruk toe sy ’n SMS kry wat wys altesame R9 000 is uit haar rekening onttrek.
Sy het nooit voorheen enige SMS’e van Absa se banknotifikasiestelsel ontvang toe 18 verskillende transaksies binne minute van haar rekening afgegaan het nie.
“Ek kan nie vir jou sê wat deur ’n mens se kop gaan wanneer jy sien hoe inkopies vir Checkers in Kagiso afgaan en jy was nie daar nie ... veral KFC en ’n mens is so honger ... ”
De Lange het gesê sy het verlede Donderdag inkopies by Fruit & Veg City in Cecil Knightstraat gedoen.
Terwyl sy gewag het dat die transaksie deurgaan, het twee vroue in die winkel haar aandag afgetrek.
“Hulle het my komplimente oor my goue horlosie gegee en heeltyd daaroor begin vryf en daarna gekyk en dit bewonder.
“Ek vermoed dit is toe hul makkers die geleentheid gekry het om my kaart te kloon.”
Sy het nie daarna enige inkopies gedoen nie.
Toe sy uiteindelik die Sondag sien die R9 000 het uit haar rekening verdwyn, het sy haar bankkaart gestop.
Absa het De Lange eergister in kennis gestel dat haar geld vervang sal word.
Wenke om jou bankkaart te beskerm
Hoe hou jy geld veilig? Nedbank se kliëntedienssentrum het dié raad:
Wees te alle tye bewus van almal en alles om jou wat jou aandag kan aftrek.
Wees veral op jou hoede by ’n kitsbank.
Gebruik ’n kitsbank waarmee jy vertroud is en wat sigbaar en veilig is.
As jy enigsins vermoed die kitsbank is onveilig, kanselleer die transaksie en meld die fout by die bank aan.
Hou jou bankkaart reg wanneer jy na ’n kitsbank stap sodat jy nie jou beursie oopmaak terwyl jy in ’n tou staan nie.
Wees versigtig vir vreemdelinge wat jou hulp aanbied om só jou kaart of PIN-besonderhede in die hande te kry.
Volg die instruksies op die skerm noukeurig.
Moenie ’n veiligheidswag om hulp vra as jy banktransaksies uitvoer nie.
Moet ook nooit jou kaart in die gleuf dwing nie.
Moenie ’n kitsbank gebruik as daar met die kaartgleuf, sleutelbord of skerm gepeuter is nie.
– Beeld