Moodley vra herverhoor
2011-08-11 15:20
Johannesburg – Donovan Moodley, wat skuldig bevind is aan die moord op die 21-jarige student Leigh Matthews, het in 'n dokument van meer 300 bladsye in die Johannesburgse hooggeregshof aansoek gedoen om herverhoor om te bewys wie haar regte moordenaars is, het The Star Donderdag berig.
Moodley beweer hy het uit vrees om sy lewe sewe jaar lank die waarheid weggesteek. Hy is in Julie 2004 skuldig bevind aan die moord op Matthews nadat hy haar van die Bond-universiteit se kampus in Sandton ontvoer het.
Moodley het haar ure lank aangehou voor hy 'n losprys van haar pa geëis en haar toe geskiet het. Hy is op 4 Augustus deur regter Joop Labuschagne lewenslange tronkstraf opgelê vir die moord, 15 jaar vir die ontvoering en 10 jaar vir uitbuiting.
In sy aansoek beweer Moodley dat drie dwelmhandelaars, bekend as Frank, Allie en Jemba, hom gedwing het om Matthews te ontvoer. Dít was ná hul poging om 'n Franse student genaamd Gasper te ontvoer, misluk het.
Hy het gesê hy het nie die dwelmhandelaars geken nie, maar wou hulle help om Gasper te ontvoer omdat hy hulle geld geskuld het en hulle ryk was.
Moodley het gesê hy was so bang vir die drie mans dat hy die Bond-universiteit se kampus verlaat het en later deur die drie mans by sy huis opgespoor is.
Hulle het aan hom gesê dat hulle Gasper nie kon opspoor nie, en desperaat was vir geld. Dit is toe dat Matthews ontvoer is.
Moodley beweer Frank het Matthews se gesin gebel en 'n losprys van R300 000 geëis en dat Jemba haar geskiet het terwyl hy moes toekyk. Moodley het gesê hy was bang en het hulle gesmeek om haar nie dood te maak nie.
Matthews se pa, Rob, het Moodley se poging as diabolies beskryf.
"Sewe jaar later en nou het hy nog 'n weergawe van die waarheid. Ek vind dit diabolies."
Brig. Piet Byleveld, ondersoekbeampte in die saak, het Moodley se pleit ten tyde van die hofsaak bevraagteken.
"Hy het 'n uitstekende verdediging gehad. Hoekom het hy skuldig gepleit?"
– Volg Nuus24 op Twitter
- SAPA