Moodley verteenwoordig homself in hof
2012-01-25 13:30
Johannesburg – Die veroordeelde moordenaar Donovan Moodley het Woensdag sy uitgerekte argument in die Johannesburgse hooggeregshof begin as deel van sy aansoek om herverhoor te word.
“Donovan Moodley het persona non grata geword. Onaantasbaar. Selfs mense na aan my het geweier om te getuig en hulle wil nie met die saak geassosieer word nie,” het hy aan die hof gesê. Moodley verteenwoordig homself.
Hy is in 2005 skuldig bevind nadat hy erken het dat hy Leigh Matthews ontvoer en vermoor het. Die 21-jarige vrou was ‘n student van die Bond-universiteit in Sandton, Johannesburg.
Moodley het ook skuld erken op aanklag van afpersing.
Hy is lewenslange tronkstraf opgelê vir moord en tot 15 jaar tronkstraf gevonnis vir ontvoering. Regter Joop Labuschagne het hom ook tot 10 jaar vir afpersing gevonnis.
Moodley was Woensdag verbaas dat Labuschagne sy saak sal aanhoor.
Moodley, wat in die hof in voetboeie verskyn het, het voor die hofverrigtinge na die aanhoudingselle teruggekeer aangesien hy teen die teenwoordigheid van die media se kameras beswaar gemaak het. Hy het later ingestem tot hul teenwoordigheid.
Die veroordeelde moordenaar het beweer dat Piet Byleveld, voormalige ondersoekbeampte, sy “mag misbruik het.”
Hy sê Byleveld het datums verander en bewyse vernietig.
Die saak duur voort.
Volg Nuus24 op Twitter
- SAPA