Moodley 'het klaar drie kanse gehad'
2012-01-26 08:02
Johannesburg – Die man wat reeds sewe jaar van sy lewenslange tronkstraf weens die moord op die student Leigh Matthews uitgedien het, het al drie kanse gehad om die waarheid te vertel.
“Hy het al drie happe van die kersie gevat. Daar is niks meer oor om te byt nie. Nou is dit ewe skielik ’n nuwe kersie,” het adv. Zaais van Zyl, staatsaanklaer, Woensdag in ’n aansoek om Donovan Moodley (31) se herverhoor in die hooggeregshof in Johannesburg aangevoer.
Volgens Van Zyl het Moodley drie geleenthede gehad om die waarheid oor Matthews se moord te ontbloot – tydens sy verhoor in die hooggeregshof en sy appèlaansoeke in die appèlhof en konstitusionele hof.
Die naakte lyk van Matthews, wat by die Bond-universiteit in Sandton ontvoer is, is in Julie 2004 in die lang gras in die Walkerville Manor-gebied, suid van Johannesburg, gevind.
Moodley, wat oorspronklik skuld op die moord beken het, voer in sy huidige aansoek aan drie dwelmsmouse het hom gedreig om by haar ontvoering betrokke te raak en dat hy moes toekyk hoe een van dié mans, slegs bekend as Jemba, haar doodgeskiet het.
Hy het gesê brig. Piet Byleveld, ondersoekbeampte in die saak, wou nooit dié weergawe van hom glo nie en het hom gedwing om skuld te beken.
Volgens hom het Byleveld ook bewyse gemanipuleer om sy “een-man”-weergawe te staaf.
Van Zyl het aangevoer dié “ware weergawe” is net ’n storie en dat Moodley dan reeds vir drie howe gelieg het.
“Nou wil hy hê die hof moet dié nuwe weergawe glo.”
Oor Moodley se weergawe dat kernbewyse, soos ’n tolpad-video, net verdwyn het, het Van Zyl gesê dié bewyse het nooit bestaan nie.
“Niks is nuut in dié weergawe nie. Sy posisie is dieselfde as in 2005.
“As Moodley dan aanvoer hy was so slim om nie dié misdaad te pleeg nie, hoekom was hy so slim om skuldig te pleit? Omdat hy gehoop het hy kry ’n vonnis ligter as lewenslank.”
Die aansoek duur voort.
Volg Nuus24 op Twitter
- Beeld