‘Monster’ Chané sal lank agter tralies sit
2011-11-26 08:27
Tom de Wet en Marisa Phillips
Virginia – ’n Reeksmoordenaar in wording, monster en psigopaat is van die woorde wat gister in die hof gebruik is om Chané van Heerden (21) te beskryf voordat sy vir ’n onbepaalde tydperk tronk toe gestuur is.
Regter A. Kruger het beslis dat sy ná 20 jaar weer voor die hof moet verskyn, wanneer haar vonnis hersien sal word. Hy het haar tot ’n gevaarlike misdadiger verklaar en ook gelas dat sy behandelingsprogramme in die tronk moet deurloop.
Adv. Johan de Nysschen, aanklaer, het in sy betoog gesê as ’n mens by Van Heerden se “kleindogtertjie-fasade” verby kyk, het jy te doen met ’n monster wat weer en weer sal moor.
Hy het gesê sy en haar medebeskuldigde (Maartens van der Merwe) het op hul slagoffer, Michael van Eck, se liggaam toegesak soos hiënas wat ’n bok verskeur.
“Van Heerden was vir meer as 90% van die lykskending verantwoordelik en wat dit nog meer walglik maak, is dat sy die daad van ‘skinning’ met haar selfoon afgeneem het.”
Van Eck is in April meer as 33 keer by die begraafplaas in Welkom met messe gesteek. Hy is nie op slag dood nie en is volgens De Nysschen doodgemartel.
Prof. Merryl Vorster, ’n forensiese psigiater, het antisosiale persoonlikheidsversteuring by Van Heerden gediagnoseer. Vorster het gedragsterapie vir haar voorgestel.
Van Eck se ouers, Naas en Henriette van Eck, en hul kinders het mekaar ná die vonnisoplegging buite die hof omhels en De Nysschen en die ondersoekbeamptes bedank.
– Volg Nuus24 op Twitter.
- Die Burger