Molewa sê ook hokaai oor Shell
2011-02-06 06:45
Johannesburg - Die oliereus Shell is op die agtervoet ná groeiende teenstand teen sy gas-eksplorasieplan in die Karoo.
In ’n belangrike verwikkeling het Edna Molewa, minister van waterwese en omgewingsake, haar steun laat blyk vir die standpunt dat meer navorsing nodig is oor die fracking-metode van eksplorasie wat Shell in die Karoo wil gebruik.
Sy het in ’n skriftelike antwoord op ’n parlementêre vraag deur Stevens Mokgalapa, DA-LP, drie gevare van fracking erken en uitgelig.
Dit is die moontlike besoedeling van grondwater; ’n afname in die vlak van grondwater weens die groot volume water wat vir die proses benodig word; en die besoedeling van die omgewing bo die grondoppervlak as die olie- en gasafval nie behoorlik geisoleer word nie.
Molewa se gevolgtrekking is dat meer navorsing benodig word oor dié eksplorasiemetode.
Gareth Morgan, DA-LP, het Molewa se versigtige benadering geloof en haar aangemoedig om, soos die DA, ’n moratorium op fracking te steun totdat meer navorsing gedoen is.
Dit het die afgelope week geblyk dat Morgan al lank ’n stryd teen fracking voer. In reaksie op Morgan se kommer oor die proses het die Petroleumagentskap van Suid-Afrika (PetroSA) geweier om ’n standpunt oor die wenslikheid van die fracking-metode in te neem.
Mthozami Xiphu, hoofamptenaar van PetroSA, het uitgewys dat hul rol bloot prosedureel is.
Intussen sê die nyweraar Johann Rupert, wie se teenstand Shell se posisie aansienlik bemoeilik, die reaksie vanuit die Karoo teen die eksplorasie deur fracking is verblydend.
“Die gemeenskap is verenig oor politieke en kleurgrense heen,” het hy by navraag aan Rapport gesê.
Rupert ontken ook dat Shell se planne baie werk in die Karoo sal skep en wys daarop dat bykans geen werk vir ongeskoolde Karoo-inwoners geskep sal word nie.
In antwoord op ’n vraag tydens die konsultasieproses het Shell self beklemtoon dat daar slegs “ongeveer 20 mense” op ’n slag betrokke sou wees by die boorproses.
“Daar is ook beklemtoon dat hierdie mense opgeleide kundiges sou wees. Dit was duidelik daarop gemik om grondeienaars gerus te stel dat daar nie ’n oorvloed mense op hul plase sal wees nie, maar ’n mens moet maar self dink hoe dit strook met die werkskeppingsbeloftes.
“Miskien moet ’n mens hierdie beloftes maar met ’n paar sakkies sout neem,” sê Rupert.
Die ander geveg tussen Rupert en Shell, oor die voorgenome uitbreiding van die Shell-vulstasie in die historiese dorp Graaff-Reinet, raak ook hewiger.
Volgens Richardt van Rensburg, prokureur van Graaff-Reinet, is alle kommunikasie in die wetlik vereiste raadplegingsproses tussen die gemeenskap en Shell verbreek omdat Shell nie sy ondernemings nakom nie.
Shell het nog twee hekkies om te oorkom voordat die vulstasie uitgebrei kan word. Eerstens moet hulle ’n permit van die Erfenisagentskap bekom nadat ’n historiese impakstudie voltooi is en tweedens moet die plaaslike stadsraad instem om die tersaaklike grond te hersoneer.
Volgens Van Rensburg het inwoners vertroue dat die twee instellings bewus is van hul plig.
Volg Nuus24 op Twitter.
- Rapport