Molesteerder woon glo 50 m van skool
2010-03-27 13:00
Stellenbosch - Ouers wat kinders in ’n kleuterskool in die Eikestad het, was vandeesweek ontsteld toe hulle verneem het ’n kindermolesteerder en die skool se eienares woon saam.
Alan Pieterse (49) het verlede Vrydag in die Pinetown-streekhof skuld beken op aanklagte van die onsedelike aanranding van ’n minderjarige, onsedelike aanranding en die besit van kinderpornografie. Hy het ’n pleitooreenkoms met die staat aangegaan.
Volgens Die Burger se inligting lui die hofdokumente dat Pieterse gevonnis is tot drie jaar gevangenisstraf wat vir vyf jaar opgeskort is, onderworpe daaraan dat hy vergoeding van R50 000 aan die slagoffer moet betaal.
Dominique Parmee (44), ma van die slagoffer, Claire Parmee (20), het aan Eikestadnuus vertel dat Pieterse haar dogter tot die ouderdom van 16 jaar vier jaar lank seksueel aangerand het. Daarna was daar weer ’n voorval toe sy 19 jaar oud was.
Die hofsaak het gevolg nadat Claire berading gekry en besluit het om in die openbaar te vertel wat al sedert 12-jarige ouderdom met haar gebeur het.
’n Emosionele Reana Brink, eienares van Kabouterland in Stellenbosch, het gister aan Die Burger gesê sy verstaan dat ouers ontsteld sal wees.
Volgens Brink is sy en Pieterse besig om te besluit of hy ander blyplek moet kry.
“Almal moet my net kans gee om my besluite te neem en my lewe uit te sorteer. Dominique probeer my en Alan ruïneer.
“Ek is al 21 jaar lank in die bedryf en die kinders is my eerste prioriteit. Alan het geen betrokkenheid by die skool nie.”
Die ouers van die kinders by die kleuterskool wou nie verdere kommentaar lewer nie.
Een van die dorp se inwoners wat anoniem wil bly, het gesê hulle woon 50 m van die kleuterskool.
“Nadat ek van die storie gehoor het, is daar geen manier dat ek my dogter van 11 maande by dié skool sal inskryf nie.”
- Die Burger