Mogoeng kap na ‘venynige’ oudregters
2011-12-29 08:43
Kaapstad – Die jongste strydpunt om die regbank is gister ontketen toe hoofregter Mogoeng Mogoeng kaalvuis ingeklim het onder “oudregters wat voortdurend en met venyn” sittende regters aanval.
Dit volg dae nadat oudregter Johann Kriegler in die organisasie Freedom Under Law (FUL) se nuusbrief Mogoeng se aanstelling as ’n “groot bron van verleentheid” bestempel het.
Mogoeng het Dinsdag by die begrafnisdiens vir oudregter Fikile Bam in die Transkei gesê kritiek deur dienende en afgetrede regters is welkom, mits hulle dit op ’n opbouende wyse doen.
“Ons raak egter bekommerd wanneer dit begin lyk of die enigste ding wat sommige van hulle ooit in die openbaar sê, is om hul dienende kollegas op ’n venynige wyse te kritiseer sonder om met alternatiewe oplossings vir wat hulle as verkeerdhede beskou vorendag te kom.”
Volgens Mogoeng is dit die moeite werd om die “nuwe en jammerlike neiging van enkele dienende en afgetrede kollegas” om die stelsel of hul kollegas in die openbaar aan te vat, te bepeins en selfondersoek te doen.
FUL, waarvan Kriegler voorsitter is, het ook onlangs ’n klag by Mogoeng ingedien oor regter-president John Hlophe van die Kaapse hooggeregshof se deelname aan die Regterlike Dienskommissie (RDK) se sittings in Oktober.
Tot die organisasie se frustrasie het Mogoeng in antwoord op die klag egter gesê die RDK sal eers ná sy volgende vergadering in April oor die kwessie kan besin.
Mogoeng het ’n lofrede gelewer aan Bam, wat sowat twee weke gelede gesterf het.
Hy het ook opnuut klem gelê op die belangrikheid van die regbank se onafhanklikheid.
“Geen regter of landdros moet ooit bang wees om dít te sê wat hy of sy as die regte ding beskou nie, bloot omdat iemand anders dit afkeur of hom of haar sal vervolg nie. En ’n ware onafhanklike regbank is nie een wat daarop uit is om enigiemand te ondersteun of teen te staan nie, maar vasbeslote is om die Grondwet sonder vrees of vooroordeel toe te pas.
“’n Ware onafhanklike regbank is een wat die moed het om die doodstraf as ongrondwetlik te bevind, met die wete dat die meeste Suid-Afrikaners gekant is teen dié bevinding. Die regbank moet hom nooit deur openbare mening laat lei nie, anders verraai hy sy grondwetlike mandaat,” het Mogoeng gesê.
– Volg Nuus24 op Twitter
- Die Burger