Moetie speel glo rol in meisie se verdwying
2011-05-05 08:15
Brandfort - Die gemeenskap van die Majwemasweu-woonbuurt op Brandfort leef nie net in vrees vir hul eie en hul kinders se lewe nie, maar glo ook moetie het ’n rol in die verdwyning van Ida Ngomba (12) gespeel.
Die polisie vermoed die verbrande beendere wat in ’n gruisgat in dié woonbuurt gekry is, is dié van Ida.
Lede van die gemeenskap het Woensdag aan Volksblad gesê hulle kan nie eens winkel toe gaan sonder om te vrees vir hul lewe nie.
’n Vrou (57) wat oorkant een van die verdagtes wat in verband met Ida se verdwyning in hegtenis geneem is, woon en anoniem wil bly, sê sy as ouer is woedend oor die meisie se verdwyning.
“Ons kan nie waag om ons kinders ná ses smiddae iewers heen te stuur nie.”
Eunice Salman (20) sê die verdwyning van ’n kind wek nie net kommer en vrees by die gemeenskap nie, maar maak ook die gemeenskap bang.
“Ek het self ’n driejarige seuntjie en vrees dat hy só iets sal oorkom.”
Johanna Mosholi (24) glo moetie het ’n rol in Ida se verdwyning gespeel.
“So iets laat jou as ouer wonder of jou kind veilig is. Jy word bang as jy dink daar is hartelose mense hier buite.”
Die verhoor van ’n man wat vermoedelik die 12-jarige meisie van Brandfort ontvoer en vermoor het, is Woensdag in die Brandfortse landdroshof deur landdros Carmen Parks tot 11 Mei vir ’n bortogaansoek uitgestel.
Luckyboy Segopolo (32) het Woensdag op aanklagte van ontvoering en poging tot moord in die hof verskyn.
- Volksblad