Moenie mynwerkers uitbuit – politikus

2012-09-30 09:37

Johannesburg – 'n Besoekende politikus van die Sosialistiese Party in die Verenigde Koninkryk het 'n beroep op die Suid-Afrikaanse mynsektor gedoen om nie mynwerkers uit te buit nie, berig RSG.

Alec Thraves is in die land om solidariteit te toon met stakende werkers by Anglo Platinum.

Dit volg nadat mynwerkers by verskeie myne in Rustenburg al vir byna vier weke staak om te vra vir ‘n basiese salarisverhoging van R12 500.

Hy sê 'n houdingsverandering deur mynhuise kan die mynsektor stabiliseer en onnodige stakings afweer.

Thraves sê dit is nodig dat myners behoorlike salarisse en werkomgewings moet hê sodat hulle 'n toekoms kan hê om na uit te sien.

Werkers by Anglo Platinum in Rustenburg is gewaarsku om die week voor ‘n tugkomitees te verskyn nadat hulle geweier het om 'n onwettige staking te beëindig.

Intussen het leiers vir die stakende werkers in Rustenburg ‘n beroep op mynwerkers oor die land gedoen om deel te neem aan ‘n massa-optog na die Uniegebou in Pretoria op 13 Oktober.

Die stakers se leier, Mametlwe Sebei, sê die optog is daarop gemik om druk op die mynbedryf te plaas om sy werkers behoorlike salarisse te betaal en om hul lewensomstandighede te verbeter.

– RSG, Eyewitness News

– Volg Nuus24 op Twitter