Moenie leë beloftes glo, waarsku Cope
2011-04-06 09:03
Upington - Die ANC se “tentakels van magsbeheptheid en gierigheid” veroorsaak dat net ’n paar individue in ’n gemeenskap bevoordeel word en die res verarm en daagliks worstel om te oorleef.
Dit was die boodskap wat Kennett Sinclair, Noord-Kaapse Cope-LP, op verkiesingsvergaderings op Fraserburg, Williston en Carnarvon aan kiesers gebring het.
Sinclair het gesê die grootste uitdaging wat Suid-Afrika in die gesig staar, is dat die ANC nie ’n onderskeid tref tussen die grondwetlike plig wat die staat moet vervul en die rol wat ’n politieke party veronderstel is om te speel nie.
“Die ANC en die staat is op elke regeringsvlak so vervleg en ineengestrengel, dat dit meedoen tot onder meer die daaglikse werklikhede van plaaslike munisipale verval, swak dienslewering, armoede en swaarkry.
“Die enigste manier om die juk van verdrukking af te skud, is om doelgerig en nougeset te mobiliseer en die ANC in die komende plaaslike regeringsverkiesing op 18 Mei 2011 te onttroon. Mense moet weer beheer van hul gemeenskappe oorneem.
“Sodoende kan inwoners van ook die platteland verseker dat waar hulle leef, werk, speel en bid, ’n omgewing geskep word wat vatbaar is vir ’n werklike volhoubare alternatief. Die ANC sal weer die staat misbruik en met elke denkbare verkiesingsfoefie kiesers bewimpel om hul leë beloftes te glo,” het Sinclair gesê.
- Volksblad