Moenie WB-gees verloor nie, vra Zuma
2010-08-19 07:39
Die Burger
Kaapstad - Die regering moet die flink dienslewering tydens die Wêreldbeker-sokkertoernooi nou volhou, het pres. Jacob Zuma Woensdag gemaan.
“Dis ’n les wat ons nie durf verlore laat gaan nie,” het Zuma tydens ’n gesamentlike sitting in die parlement gesê waar die toernooi in nabetraging gedebatteer is.
Die DA-leier en Wes-Kaapse premier, Helen Zille, het gesê vir ’n verandering het die regering nie sy voete gesleep om projekte afgehandel te kry nie. “Hoe het ons dit reggekry om ’n toernooi op hierdie skaal te organiseer, terwyl mense ná 16 jaar van demokrasie steeds nie toegang het tot basiese dienste nie? Die antwoord is baie eenvoudig: Fifa het ’n onveranderlike spertyd aan ons gestel,” het Zille gesê.
Zuma het ook gesê die ware sterre van die toernooi is die land se mense – swart en wit. “Ons het suksesvol die stereotipes oor ons vasteland verkeerd bewys.”
Dr. Pieter Mulder, leier van die VF+ en adjunkminister van landbou, het gesê daar is geen rede waarom die sukses van die toernooi nie gebruik kan word om Suid-Afrika se ander probleme te takel nie.
Volgens die IVP-leier, dr. Mangosuthu Buthelezi, het hy in sy 82 jaar nog nooit Suid-Afrikaners só verenig gesien as met die toernooi nie.
Volg Nuus24 op Twitter