Moenie Oscar se bedoeling 'verdraai'
2013-02-22 13:47
Pretoria – Oscar Pistorius se beweerde bedoeling om 'n inbreker dood te skiet moenie verdraai word in 'n bedoeling om sy vriendin te vermoor nie, het sy regsverteenwoordiger Vrydag gesê.
"Die vraag hier is, hoe sou 'n redelike persoon onder die omstandighede optree?" het adv. Barry Roux tydens Pistorius se borgtogaansoek in die Pretoriase landdroshof gesê.
Pistorius word daarvan beskuldig dat hy sy vriendin, Reeva Steenkamp, op 14 Februarie by sy huis in die ooste van Pretoria doodgeskiet het.
Hooflanddros Desmond Nair het onder andere gevra watter straf Roux sou aanbeveel as 'n inbreker wel in die toilet was.
"Ons sal vra vir strafbare manslag," het Roux geantwoord.
Adv. Gerrie Nel, staatsaanklaer, het aangevoer dat Pistorius bedoel het om moord te pleeg toe hy geskiet het, al het hy gedink hy skiet 'n inbreker.
Nel het ook vroeër gesê Pistorius se gestremdheid maak hom nie anders as enige ander persoon wat van 'n misdaad aangekla is nie.
"Die feit dat hy kunsbene het maak hom nie anders nie. As iemand met 'n gestremdheid 'n misdaad pleeg, sien ons dit nie anders nie," het Nel gesê.
"Indien die applikant met sy kunsbene in Suid-Afrika kan woon, kan hy enige plek woon."
Nel het herhaal dat hy dink Pistorius is 'n vlugrisiko.
Hy het nie erken hy het 'n huis in Italië gebruik nadat dit in 'n tydskrifartikel bekend gemaak is nie.
Nair het gesê indien 'n persoon kunsbene het en oral gesoek word, sal hulle dit moet wegsteek deur byvoorbeeld 'n langbroek te dra.
"Ons sê die hof moet borgtog weier," het Nel gesê.
– Volg Nuus24 op Twitter
