Modimolle-monster 'wou nie vrou seermaak'
2012-11-22 14:45
Pretoria – Johan Kotzé het nooit bedoel om sy eksvrou seer te maak nie, maar kon homself nie help nie, het die stad se hooggeregshof gehoor.
Die sogenaamde Modimolle-monster se advokaat, Bernard Bantjes, het hierdie en ander stellings aan sy eksvrou, Ina Bonnette, gemaak.
Kotzé, Andries Sithole, Pieta Mohlane en Frans Mphaka word daarvan aangekla dat hulle Bonnette herhaaldelik verkrag, aangerand en probeer vermoor het. Hulle word ook daarvan beskuldig dat hulle haar seun, Conrad (19), doodgeskiet het.
Die mans het op alle aanklagte teen hulle onskuldig gepleit.
Bantjes het aan Bonnette gesê sy kliënt kan nie onthou dat hy haar tepel met tange “seergemaak” en “stadig” ‘n naald by een van haar borste ingedruk het nie.
Kotzé het bang geword toe hy bloed gesien het, en die bloeding met medikasie probeer stop.
Die beskuldigde beweer hy was ook bang en baie ontsteld toe hy later in die koerante lees dat albei haar tepels "afgeknip" is.
Bonnette het vroeër getuig Kotzé het haar tepels tydens ‘n langdurige martel-sessie afgesaag.
“Hy sê julle het mooi met mekaar gepraat en toe was daar uitbarstings,” het die regsverteenwoordiger gesê.
“Hy sê hy kon homself nie regtig beheer nie.”
“Hy sal aanvoer dat dit nie sy bedoeling was om jou seer te maak nie. Hy sê dis nie in sy geaardheid om enigiemand seer te maak nie.”
Bonnette het geantwoord: “Wel... hy het my gemartel en seergemaak.”
Sy het ook haar eksman se weergawe – dat hy sy medebeskuldigdes gesmeek het om haar nie seer te maak nie – van die hand gewys.
Die verhoor duur voort.
Volg Nuus24 op Twitter
- SAPA
