'Modimolle-monster' se verhoor uitgestel

2013-02-04 11:48

Johannesburg – Die verhoor van die man wat as die Modimolle-monster bekendstaan is Maandag in die Noord-Gautengse hooggeregshof uitgestel omdat sy regspan besig is met die Boeremag-verhoor.

Johan Kotzé se verhoor is tot 15 April uitgestel.

Kotzé sal na 'n psigiatriese hospitaal in Bloemfontein terugkeer, terwyl sy drie medebeskuldigdes in aanhouding bly.

Hy word daarvan beskuldig dat hy drie mans gehuur het om Ina Bonnette, sy eksvrou, te verkrag en dat hy sy stiefseun Conrad op 3 Januarie doodgeskiet het.

Kotzé sou in Desember en Januarie nóg psigiatriese toetse ondergaan om vas te stel of hy verantwoordelik gehou kan word vir sy dade.

Adv. Bernard Bandjies, wat Kotzé verteenwoordig, het tydens sy laaste hofverskyning gesê 'n verslag wat deur drie sielkundiges by die Weskoppies- psigiatriese hospitaal saamgestel is, is onvolledig.

Luidens die verslag is Kotzé geskik om verhoor te word.

Die verdediging het verlede jaar aangedui Kotzé sal getuig dat hy nie in beheer was van sy emosies toe hy Bonnette en haar seun aangeval het nie.

Bandjies het gesê sy kliënt was emosioneel getraumatiseer deur sy verhouding met Bonnette en die verbrokkeling van hul huwelik.

Die staat sal na verwagting nog twee getuies roep voor hy sy saak afsluit.

– Lees meer hier

– Volg Nuus24 op Twitter