Johan Kotzé 'in trane' in hof

2012-11-20 14:00

Kaapstad – Verslaggewers sê Johan Kotzé, wat van die verkragting en marteling van sy eksvrou, Ina Bonnette, aangekla word, het in die hof begin huil.

Volgens die joernaliste is die hof vlugtig verdaag nadat die slagoffer ‘n emosionele en gedetailleerde getuienis gelewer het.

Kotzé – beter bekend as die Modimolle-monster – het na bewering in trane uitgebars toe Bonnette getuig het.

'n Emosionele Bonnette het volgens die SABC getuig hoe Kotzé haar na sy huis gelok het om hulle egskeiding te bespreek en te praat oor hoe om hulle eiendom te verkoop.

Sy het beskryf hoe sy deur die drie medebeskuldigdes vasgekeer is ná hulle uit 'n kas in die kamer te voorskyn gekom het.

Volgens die dagblad Beeld het sy getuig dat Kotzé haar in die oë gekyk het, haar ounooi genoem het en vertel het hoe lief hy haar het. Hy het toe ‘n klein saag uit sy broeksak te voorskyn gebring, en haar tepels daarmee afgesny. 

Die dagblad het vroeër via Twitter berig slegs nege verslaggewers en Bonnette se vriendinne is tydens haar getuienis in die Pretoriase hooggeregshof toegelaat.

Joernaliste is nie toegelaat om tydens haar getuienis te tweet nie.

Kotzé en sy drie medebeskuldigdes word daarvan aangekla dat hulle Bonnette om die beurt verkrag en gemartel het. Die mans het op al dié aanklagte teen hulle skuld ontken.

Volg Nuus24 op Twitter