Modimolle-monster: Saak uitgestel
2012-02-10 09:33
Fotogalery - GALERY: Modimolle-monster se saak uitgestel
klik op klein foto bo om groter prentjie te sien
Kaapstad – Die saak teen die sogenaamde “Modimolle-monster” en sy medebeskuldigdes is tot later vanjaar uitgestel, het Sapa berig.
Beeld het vanuit die hof op Twitter bekendgemaak dat Johan Kotzé en sy drie medebeskuldigdes nie aansoek om borgtog sal doen nie.
Die staat het versoek dat die verhoor tot 11 Mei uitgestel word vir verdere ondersoek.
Sapa het vroeër berig dat polisiebeamptes, joernaliste en vroueregte-aktiviste Vrydagoggend buite die Modimolle-landdroshof bymekaar gekom het.
Kotzé word daarvan aangekla dat hy die marteling en verkragting van sy vervreemde vrou, Ina Bonnette, georkestreer het.
Daar word beweer dat Kotzé die drie mans met ‘n vuurwapen gedreig om Bonnette te verkrag.
Kotzé word ook daarvan beskuldig dat hy Bonnette se seun, Conrad (19), doodgeskiet het.
Lede van die ANC se vroueliga was reeds om 07:00 buite die hof.
Troy Martens, woordvoerder vir die vroueliga, sê hulle is daar om Bonnette te ondersteun.
“Die vroueliga loof Bonnette vir haar moed en dapperheid deur hierdie beproewing...” het sy gesê.
“... Ons wil hê Bonnette moet weet dat sy die ondersteuning van alle Suid-Afrikaanse vroue het.”
Kotzé staan tereg op 17 aanklagte, waaronder verkragting, moord, sameswering tot verkragting, ontvoering en aanranding met die opset om ernstig te beseer.
Volg Nuus24 op Twitter