Modimolle: Seun se noodlottige wonde beskryf
2012-11-26 17:45
Pretoria – Die stiefseun van die sogenaamde Modimolle-monster Johan Kotzé het weens skietwonde aan sy kop en bors gesterf, het die Pretoriase hooggeregshof Maandag gehoor.
Dr. Camillus Molulu, 'n patoloog van Bela-Bela, wat 'n nadoodse ondersoek op die 19-jarige Conrad Bonnette uitgevoer het, het getuig dat Bonnette 'n skietwond aan sy knie en wonde aan sy kop en bors gehad het.
Die skoot aan sy kop het deur die regterkant van sy onderlip beweeg, deur sy brein beweeg en in die boonste gedeelte van sy skedel vasgesit.
Die skoot in sy bors het deur sy regterbors beweeg, deur sy hart en longe beweeg en in die spiere in sy linkerskouer vasgesit.
Molulu het gesê albei wonde was noodlottig.
Die kopwond sou veroorsaak het dat Bonnette onmiddellik sterf en die wond aan sy borskas sou veroorsaak het dat hy binne minute sterf.
Albei koeëls is in 'n afstand verder as 60 cm afgevuur, omdat geen buskruit rondom die wonde gevind is nie.
Kotzé, Andries Sithole, Pieta Mohlane en Frans Mphaka word daarvan beskuldig dat hulle Bonnette vermoor het. Hulle word ook daarvan beskuldig dat hulle Kotzé se eksvrou, Ina Bonnette, herhaaldelik verkrag, aangerand en probeer het om haar te vermoor.
Die verhoor duur voort.
– Volg Nuus24 op Twitter
- SAPA
