Mistige weerstoestande dalk oorsaak van heli-ongeluk
2010-07-23 19:26
Johannesburg – Mistige weerstoestande is moontlik die rede vir die helikopter-ongeluk waarin sewe polisiebeamptes Vrydagoggend gesterf het, het die polisie gesê.
“Op hierdie stadium word daar gespekuleer dat mistigheid dalk die oorsaak van die ongeluk was,” het Zweli Mnisi, woordvoerder van Nathi Mthethwa, minister van polisie in ‘n verklaring gesê.
Die helikopter, wat sewe persone vervoer het, insluitende lede van die polisie se intervensie-eenheid het in ‘n veld net buite Witbank neergestort en aan die brand geslaan. Almal aan boord het gesterf.
Mthethwa en genl. Bheki Cele, nasionale polisiehoof, het die ongelukstoneel besoek.
Volgens Mnisi wou die polisiebeamptes bystand bied tydens ‘n gewapende rooftog by ‘n bakkery in Witbank.
“Ongeveer 05:00 Vrydagoggend het die alarm by die Jabulani-bakkery afgegaan. Met die polisie se aankoms op die toneel was sewe verdagtes besig om die bakkery te beroof. Hulle het op die polisie begin skiet,” het hy gesê.
Twee helikopters wat lede van die polisie se intervensie-eenheid vervoer het is na die toneel ontplooi.
“Een van die helikopters het toe neergestort,” het Mnisi gesê.
Die sewe verdagtes is almal in hegtenis geneem.
Mthethwa het sy medelye met die families en vriende van die oorledenes uitgespreek.
Die polisiebeamptes wat in die ongeluk gesterf het was die vlieënier kapt. Wikus Zaayman (31) en sy bemanningslid, ao. Thinus Gouws (39).
Die lede van die nasionale intervensie-eenheid was kol. Teboho Percy Maduna (39), ao. Colin Davids (37), ao. Dirk Cornelis van Aswegen (35), sers. Jacobus Henning (28) en sers. Daniel ‘Kraai’ de Bruin (31).
- Volg Nuus24 op Twitter.
- SAPA