Misdadige polisielede 'moet in tronk vrot'
2011-08-11 07:05
Kaapstad – Klagte teen polisiebeamptes het in die afgelope boekjaar skerp toegeneem en enigeen wat hom of haar aan misdadige bedrywighede skuldig maak, sal in die tronk verrot.
Dít was Woensdag Nathi Mthethwa, minister van polisie, se waarskuwing aan polisiebeamptes wat hulle aan misdadigheid skuldig maak. “Enige polisiebeampte wat daaraan skuldig bevind word dat hy of sy met misdadigers saamsweer, of by aanranding, moord, verkragting, poging tot verkragting en seksuele aanranding betrokke is, verdien om in die tronk te vrot.”
Die DA, wat ’n vraag oor klagte teen polisielede by die parlement ingedien het, het sy diepe kommer oor die situasie uitgespreek en het dit as ’n massiewe toename in geweldsmisdaad bestempel. Die party voel Mthethwa praat te veel oor korrupsie en doen nie veel nie.
Mthethwa se waarskuwing volg kort op ’n skriftelike antwoord wat op die DA-vraag gegee is en waarin hy gesê het 768 klagte is sedert 1 Januarie 2009 teen polisielede ingedien.
In die 2009-’10-boekjaar was daar 316 klagte en in die daaropvolgende boekjaar 452.
Klagte van aanranding het toegeneem van 199 tot 317, moord van 35 tot 45 en seksuele aanranding van 30 tot 41.
In dié tydperk het klagte van verkragting met twee afgeneem tot 46. Dié van poging tot verkragting het van vier tot drie verminder.
Mthethwa het gesê die straf vir misdadigers in blou uniform moet swaarder as dié vir normale misdadigers wees.
– Volg Nuus24 op Twitter
- Die Burger