Misdaadstatistieke vandag bekend
2012-09-20 08:30
Johannesburg – Die polisieminister, Nathi Mthethwa, sal Donderdag Suid-Afrika se misdaadstatistieke vir die 2011/2012 boekjaar in die parlement bekendmaak.
Riah Phiyega, die nasionale polisiekommissaris, sal by Mthethwa aansluit.
Verlede jaar se misdaadstatistieke het getoon dat moorde in die land met 6,5% afgeneem het na 15 940 moorde.
Poging tot moord het met 12,2% afgeneem en seksuele oortredings met 3%.
Die aantal verkragtingsake wat aangemeld is, het van 55 097 na 56 272 gestyg.
In die tydperk is 94 polisiebeamptes vermoor terwyl hulle aan diens was. Dit is ‘n afname van die vorige jaar se syfer van 110 polisiebeamptes.
Aanranding met die doel om ernstig te beseer het met 4,5% gedaal, terwyl roof met verswarende omstandighede met 12% afgeneem het.
Huisroof het met 10% gedaal na 16 889 sake tydens die 2010/11 finansiële jaar – die eerste afname sedert 2004.
Kapings is af met 23,6% na 10 700 gevalle, terwyl vragmotor-kapings af is met 29,2% met 413 gevalle wat aangemeld is.
Transito-rooftogte het met 18,7% gedaal en bankrooftogte is af met 58%.
Die hoeveelheid inbrake by residensiële eiendomme het met 4,8% gedaal, maar daar was ‘n toename van rooftogte by nie-residensiële eiendomme van 0,9%, veral onder kleinhandelaars soos spazawinkels, supermarkte en skole.
Gevalle van dronkbestuur of bestuur onder die invloed van dwelms het met 4,5% gestyg.
Handelsmisdaad het met 2,8% gestyg en is hoofsaaklik oorheers deur kubermisdaad.
– Volg Nuus24 op Twitter
- SAPA
