Misdaad styg in Vrystaat
2011-09-09 07:05
Bloemfontein - Terwyl seksuele misdade in die res van Suid-Afrika afgeneem het, het dit in die Vrystaat toegeneem.
Ook het moorde in dié provinsie toegeneem teenoor ’n nasionale afname.
Die minister van polisie, Nathi Mthethwa, het Donderdag die land se misdaadsyfers vir 2010-’11 aangekondig.
Seksuele misdade, wat onder meer verkragting insluit, het in die Vrystaat met 8,6% toegeneem, terwyl die nasionale syfer met 3,1% gekrimp het teenoor 2009-’10.
Meer as 171 Vrystaters, meestal vroue en kinders, per 100 000, is seksueel aangerand. Dit is meer as 4 800 mense.
Moordenaars in die Vrystaat was ook meer aktief as elders in Suid-Afrika met ’n toename van 8,6%, terwyl die nasionale moordsyfer met 6,5% afgeneem het.
Meer as 960 mense is tussen April 2010 en Maart 2011 in die Vrystaat vermoor.
Die meeste ander misdade het wel afgeneem.
Meer as 1 500 mense is uitgevang dat hulle onder die invloed van sterk drank of dwelms bestuur, effens minder as die 1 653 van verlede jaar.
Witboordjiemisdaad het met 39% toegeneem teenoor die vorige jaar.
Prof. Dap Louw, kriminoloog, sê as syfers in sekere soorte misdade styg, behoort dit as positief beskou te word. “Die feit dat witboordjiemisdaad toegeneem het, behoort verblydend te wees. Dit beteken meer mense is uitgevang. Daar was beter polisiëring-maatreëls.”
Volgens hom kan die afname in dronkbestuur kommer wek.
“Dit beteken nie noodwendig dat daar minder dronk bestuurders in die Vrystaat is nie. Dit kan beteken dat polisiëring van dronk bestuurders swakker was.”
Louw sê dit is normaal dat misdaadsyfers styg wanneer ’n land van ’n verdrukkende bestel, soos apartheid, oorgaan in ’n vryer bestel.
“Rusland is ’n voorbeeld. Ná kommunisme het hul misdaadstatistieke die hoogte in geskiet. Dit kan met studente wat ná skool universiteit toe gaan, vergelyk word. Hulle weet nie altyd hoe om die nuutgevonde vryheid te hanteer nie, en begin byvoorbeeld baie drink en lang hare groei.”
Hy sê dieselfde geld Suid-Afrika.
“Die goeie nuus is dit stabiliseer later.”
Abrie Oosthuizen, VF+-leier in die Vrystaat, sê die doodstraf moet teruggebring word.
“Misdadigers is nie meer bang vir die strawwe wat aan hulle opgelê word nie.”
Hy sê daar moet onderskeid getref word tussen plaasmoorde en ander moorde.
“Plaasmoorde in die provinsie het die afgelope jaar toegeneem. Die minister moet dit apart uitlig.”
Volgens Oosthuizen dui die toename in moorde en seksuele misdade op swak polisiëring in die Vrystaat.
“Met moorde en seksuele misdade staan die Vrystaat soos ’n seer vinger uit.”
Volg Nuus24 op Twitter.
- Volksblad