Minnares moet uit ontslape sakeman se huis
2012-10-22 11:38
Johannesburg – Familielede van 'n ontslape Pretoriase sakeman het hul tot die hof gewend om sy minnares van 15 jaar, met wie hy 'n buite-egtelike verhouding gehad het, uit ’n huis te laat sit, het Beeld berig.
Hoewel wyle Jan Tielman Rall se familie die hooggeregshof in Pretoria gevra het om Berdine Venter dadelik uit ’n huis in Elarduspark te laat sit, het regter Tati Makgoka haar 30 dae kans gegee om alternatiewe blyplek te soek.
Makgoka het gesê Rall se verhouding met Venter het skynbaar 15 jaar geduur tot sy dood op 26 Augustus 2010.
Rall was alleenlid van die beslote korporasie (BK) Jandre Electrical Contractors in Pretoria, en ná sy dood, het sy dogter, Theresa Erlank, die BK se alleenlid geword.
Die huis in Elarduspark is in Maart 2010 gekoop en behoort aan die BK.
Hoewel Rall in sy testament gesê het sy minnares moet lewenslank in die huis woon, het Makgoka beslis dat hy nie die reg gehad het om dit te doen nie. Dít omdat die huis aan die BK behoort en nie aan hom nie.
– Volg Nuus24 op Twitter
- SAPA
