Minnares lieg glo oor ervaring en kwalifikasies
2011-04-24 07:36
Rapport
Toe Sicelo Shiceka, minister van samewerkende regering en tradisionele sake, vir sy minnares ’n senior pos by ’n bankrot munisipaliteit gegee het, het hy iemand aangestel wat geen ervaring van plaaslike regering gehad het nie én pas afgedank is omdat sy oneerlik en onbekwaam was.
Rapport het verlede week berig oor Nana Masithela (38) se aanstelling einde 2009 as finansiële hoof van die Madibeng-munisipaliteit in Noordwes deur Shiceka se departement.
Sy het R80 000 per maand verdien en die munisipaliteit het boonop haar behuising betaal.
Volgens haar CV, wat die burgemeester van Madibeng voor haar aanstelling aan die munisipale bestuurder gegee het, het sy ’n MBA-graad en ervaring in die bankwese.
Masithela en Shiceka se kantoor het versuim om die Madibeng-munisipaliteit in te lig dat sy pas afgedank is deur die landboudienstegroep Afgri, waar sy as kredietbestuurder gewerk het.
Pieter Badenhorst, Afgri se regsadviseur, het dié afdanking bevestig, maar geweier om redes te verskaf.
Rapport verneem van gewese kollegas van Masithela sy is afgedank omdat sy onbekwaam was en omdat sy oor haar MBA-graad gelieg het.
’n Maand nadat Afgri Masithela afgedank het, het Shiceka se departement haar na Madibeng gestuur om die munisipaliteit uit sy haglike geldelike gemors te probeer red.
Masithela het die telefoon neergegooi toe Rapport haar die afgelope week genader het om kommentaar. Shiceka se kantoor het nie gereageer op vrae waarom Masithela na Madibeng gestuur is en of hulle bewus was van haar verdagte kwalifikasies en twyfelagtige werkgeskiedenis nie.
Dikgape Makobe, Madibeng se waarnemende munisipale bestuurder, en Eric Matlawe, die administrateur, het alles moontlik gedoen om van Masithela ontslae te raak.
In ’n brief aan Shiceka se kantoor het hulle gekla oor haar onbevoegdheid, dat sy geen toepaslike ervaring gehad het nie en boonop glo die munisipaliteit in nóg dieper geldelike chaos gedompel het.
Die minister se kantoor het geweier om haar te herroep. Masithela het enigiemand wat haar teëgegaan het, gedreig. Sy het gesê sy is “onaantasbaar” omdat die minister “haar beskerm” en hy haar persoonlik by die munisipaliteit “ontplooi” het.
* Rapport het verlede week berig dat Shiceka, wat sedert Februarie met siekteverlof is, met ’n string vroue verhoudings gehad het. Hy het ook kinders by sommige van dié vroue gehad.
Die Sunday Times het ook berig dat Shiceka meer as R300 000 uitgegee het op ’n besoek aan sy gewese vriendin wat twee jaar gevangenisstraf in ’n Switserse tronk uitdien. Hy het ook in een jaar R640 000 bestee aan verblyf vir homself en sy personeel in Kaapstad se luukse One&Only-hotel.
Masithela het die minister ook verlede jaar vergesel op ’n buitelandse reis na België om nuwe rekenaarstelsels vir plaaslike regering te gaan bekyk. Rekenaarstelsels was egter nie een van haar verantwoordelikhede by Madibeng nie.
- Rapport