Minister word vrywilliger by Bara
2010-08-20 17:36
Die minister van gesondheid, Aaron Motsoaledi, het as vrywilliger vir diens gerapporteer by die Chris Hani Baragwanath-hospitaal te midde die landwye staking deur staatsdienswerkers.
“Om ‘n dokter te wees, is soos om te bestuur… ná 16 jaar buite die professie is my hande steeds aan,” het hy Vrydag buite dié hospitaal aan joernaliste gesê.
Motsoaledi het per bus met 60 gekwalifiseerde dokters, verpleegsters en aptekers opgedaag om die staking se gevolge vir die hospitaal te verlig.
“Ek sal nie braaf genoeg wees om ‘n diagnose te maak nie, maar ek sal hand bysit waar ek kan. Miskien sal ek selfs in die teater wees, of ‘n keisersnit uitvoer,” het hy gesê.
Motsoaledi het in April weer by die Raad op Gesondheidsberoepe van Suid-Afrika geregistreer.
Hy het gesê heelwat hospitale in die land het ‘n krisispunt bereik, maar kon nie kommentaar lewer oor hoeveel mense al dood is weens die staking nie.
Motsoaledi het die staking deur gesondheidswerkers veroordeel en gesê dat mense selfs in tye van oorlog nie net uit hospitale hardloop en pasiënte verlaat nie.
Hy is nie bewus van enige dokters wat staak nie.
- SAPA