Minister wéér in sop oor peperduur verblyf
2009-10-18 16:09
Johannesburg - Nathi Mthethwa, minister van polisie, het nóg 'n rekening by 'n peperduur hotel opgejaag. Dié keer meer as R500 000 in Durban.
Die Sunday Independent berig dat Mthethwa en polisiebeamptes verantwoordelik vir sy persoonlike veiligheid tussen 19 September en 25 April in die luukse Hilton-hotel geboek was teen 'n koste van R578,499.
Sy woordvoerder, Zweli Mnisi, het nie kommentaar gelewer op dié bedrag nie. Hy het gesê Mthethwa was in Desember in KwaZulu-Natal as deel van sy "amptelike pligte".
Volgens Mnisi was Mthethwa in Desember in KwaZulu-Natal om deel te neem aan veldtogte om misdaad oor die feesseisoen te verminder. Mthethwa se verblyf in April was tydens die nasionale verkiesing.
Luidens die Sunday Independent se afskrif van Mthethwa se rekening, was hy Kersfees en Nuwejaar in dié hotel.
Tydens Mthethwa se ononderbroke verblyf van 17 dae vanaf 17 Desember was hy sonder wagte in die hotel. Dié rekening het meer as R86 000 beloop.
Die aand voor Valentynsdag was Mthethwa by dieselfde hotel ingeboek, dié keer met vier wagte teen 'n koste van R38,516.
Van 19 tot 25 April het hy en twee wagte in dié hotel gebly. Dié rekening was R89,000.
Die rekening by die Hilton-hotel is dubbel as dié wat belastingbetalers vir Mthethwa se 17-dag verblyf in die Table Bay-vyfsterhotel in Kaapstad vroeër vanjaar opgedok het. Mthethwa se verblyf by dié hotel het R234 000 beloop terwyl sy huis weens vloedskade herstel moes word.
Mnisi het gesê die minister het nie geweet die verblyf by dié hotel is so duur nie.
Opposisiepartye het met woede reageer teenoor Mthethwa se jongste "verkwisting".
– Sapa