Minister waarsku bestuurders ná uitspraak
2011-12-12 19:57
Kaapstad – Sibusiso Ndebele, minister van vervoer, het bestuurders gewaarsku dat hulle van moord aangekla sal word as daar bewys kan beword dat hulle ‘n “soort voorneme” gehad het om dood te veroorsaak.
Ndebele se opmerkings kom nadat die minibus-taxibestuurder Jacob Humphreys skuldig bevind is aan die moord op 10 kinders, wat dood is toe sy taxi verlede jaar deur ‘n trein getref is.
Volgens die minister sal die departement aggressief te werk gaan met onverantwoordelike bestuurders.
“In die gevalle waar bewys kan word dat ‘n motoris se optrede van só ‘n aard was dat daar afgelei kan word dat hy ‘n soort voorneme gehad het om die dood van die oorledene te veroorsaak, sal die motoris van moord aangekla word.”
Regter Robert Henney, in die Wes-Kaapse Hooggeregshof, het Humphreys (55) Maandag skuldig bevind op 10 klagte van moord en vier van poging tot moord.
Familielede van die kinders, wat die hof se openbare galery volgesit het, het na hul asems gesnak toe Henney die uitspraak gelewer het. Sommige het in trane uitgebars.
Humphreys het uitdrukkingloos gebly en sy hande voor hom vasgehou terwyl die uitspraak gelewer is.
Ndebele het die uitspraak verwelkom.
“Ons samelewing het agteruitgegaan tot ‘n vlak waar sommige bestuurders aanhou om ‘n blatante minagting vir menslike lewe te toon. Ons sal aanhou seker maak dat ons meer aggressief te werk gaan met onverantwoordelike bestuurders om ons... reg tot lewe te beskerm.”
- Volg Nuus24 op Twitter
- SAPA