Minister vergader met Lonmin-bestuur

2012-08-28 21:14

Johannesburg – Mildred Oliphant, minister van arbeid, het Dinsdag in Wonderkop naby Marikana in die Noordwes aangekom om met die mynbestuur en verteenwoordigers van die stakende Lonmin-werkers te vergader.

Die vergadering sal agter geslote deure plaasvind.

Oliphant sal ook met die National Union of Mineworkers (NUM), die Association of Mineworkers and Construction Union (Samcu), Solidariteit en Uasa vergader in ‘n poging om 'n einde aan die staking te bring.

Zolisa Bodlani, woordvoerder van die werkers, het vroeër gesê die werkers se eise vir ‘n maandelikse salaris van R12 500 is nie in vorige vergaderings met die mynbestuur bespreek nie.

Bodlani het gesê werkers wil weet wat die rol van die vakbonde gaan wees tydens Woensdag se vergadering met die minister.

Die stakende werkers het vroeër aangedui hulle wil hulself verteenwoordig sonder die hulp van die vakbonde.

‘n Vergadering om ‘n vredesooreenkoms te teken sal Woensdag om 10:00 in die Rustenburg-burgersentrum gehou word.

Die vergadering is deur Oliphant gereël en sal deur vakbonde, die bestuur van Lonmin en verteenwoordigers van die werkers bygewoon word.

– Volg Nuus24 op Twitter.

 

- SAPA