Minister van onderwys bedreig demokrasie, sê DA
2010-08-24 09:35
Pretoria – Dr. Blade Nzimande, minister van hoër onderwys en opleiding, is nie geskik vir dié pos nie.
Dr. Wilmot James, DA-woordvoerder oor hoër onderwys en opleiding, het gister in ’n verklaring gesê die hoëronderwysstelsel sal sonder Nzimande beter daaraan toe wees.
“Hy is ’n bedreiging vir vryheid en demokrasie. Hy is nie ’n onderwysminister wat die nasie dien nie, maar eerder ’n kommissaris wat sy gewig rondgooi.”
James meen dit is ietwat van ’n politieke obseniteit as ’n minister wat vir hoër onderwys verantwoordelik is die muilband van die media ondersteun. Hy het gesê Nzimande se steun vir die mediatribunaal is net so outoritêr soos sy opdrag dat universiteite programme moet aanbied ter ondersteuning van die ANC se sogenaamde “ontwikkelende staat”.
Volgens James het dit nog nie tot Nzimande deurgedring dat koerante verantwoordbaar teenoor hul lesers is nie. “Lesers besluit watter koerante om te koop, te lees of te glo. Hulle besluit self wat geloofwaardig is.
“Nzimande het geen respek vir ’n individu se oordeel nie, omdat hy nie respek vir individue het nie,” het James gesê.
Volgens hom het dit ook nog nie tot Nzimande deurgedring dat dit sy werk is om opleiding van studente aan te moedig wat hulle idees laat ontgin eerder as om die knie voor die propaganda van die politiek-korrektes te laat buig nie.
James het gesê Nzimande is aanmatigend as hy dink hy kan besluit wat vir mense goed is en wat hul kinders moet leer. “Hy moet gaan, en sommer nou.”
- Die Burger