Minister 'te siek' vir vrae oor motorhuur
2011-07-12 09:00
Kaapstad. – Sicelo Shiceka, minister van samewerkende regering en tradisionele sake, is “te siek” om ’n parlementêre vraag oor sy besteding aan gehuurde motors te beantwoord.
Shiceka is reeds vyf maande met siekteverlof en Nathi Mthethwa, minister van polisie, neem in sy plek waar.
Die DA wou in ’n parlementêre vraag weet hoeveel Shiceka sedert Maart verlede jaar aan die huur van motors bestee het.
Sy kantoor het egter gesê hy sal dié vraag eers kan beantwoord wanneer hy herstel het van sy “ongesteldheid”.
Dit is nie bekend presies waarom hy met siekteverlof is en wanneer hy na sy pos sal terugkeer nie.
Vuyelwa Vika, sy woordvoerder, het gister by navraag gesê Shiceka sal eers terugkeer “wanneer dokters tevrede is dat hy genoegsaam aangesterk het”.
Ian Ollis, DA-LP, het in sy reaksie gesê Shiceka se antwoord is “oneerlik” aangesien sy kantoor in elk geval die verlangde inligting behoort te hê.
“Die minister se kantoor het in elk geval op die betrokke dag 13 ander parlementêre vrae beantwoord; waarom kan hulle nie op dié spesifieke vraag reageer nie,” wou Ollis weet.
– Volg Nuus24 op Twitter
- Die Burger