Minister se verskoning verwerp
2013-02-28 11:01
Johannesburg – Die verskoning wat deur Lulu Xingwana, minister van vroue, kinders en gestremdes aangebied is oor haar kommentaar aangaande Afrikanermans en Calvinisme, kom geforseerd voor, het die vrouevereniging van die Verenigde Demokratiese Beweging (UDM) Donderdag gesê.
"Hoewel die minister nou om verskoning gevra het, klink dit geforseerd en die enigste rede waarom sy dit gedoen het was omdat sy gedwing was, nie omdat sy werklik spyt was nie," het Thandi Nontenja, die vereniging se sekretaris-generaal, in 'n verklaring gesê.
Nontenja het gesê dit lyk of Xingwana "sukkel om te beheer wat uit haar mond kom".
Die ministerie van vroue, kinders en gestremdes is geskep om gelykheid te bevorder, "...maar ons wil hê mevrou Xingwana moet self haar tasse pak, of pres. [Jacob] Zuma moet haar die deur wys, sodat iemand wat bevoeg is die leisels kan oorneem in hierdie departement," het Nontenja gesê.
Die minister het vroeër om verskoning gevra vir haar uitlatings oor Afrikaner-mans, wat dié week 'n hewige reaksie ontlok het.
"Dit het vir my duidelik geword dat my kommentaar sommige lede van ons gemeenskap ontstel het.
"Ek wil, gevolglik, daardie kommentaar terugtrek en onvoorwaardelik om verskoning vra aan hulle," het sy gesê.
Dié verskoning volg ná Xingwana aan die Australiese Uitsaaikorporasie (ABC) gesê het jong Afrikanermans word grootgemaak om te glo dat hulle vroue en kinders "besit".
"Jong Afrikanermans word grootgemaak in die Calvinistiese geloof en glo hulle besit 'n vrou, hulle besit 'n kind, hulle besit alles, en daarom kan hulle daardie lewe neem, want hulle besit dit," het sy gesê.
"Ons het ook kulturele verskille in ons eie gemeenskappe waar ons vroue het wat gedwing word om te trou en ons hanteer al daardie sake."
ABC het 'n onderhoud met Xingwana gevoer oor die dood van die Paralimpiese kampioen Oscar Pistorius se vriendin, Reeva Steenkamp.
Die insetsel, wat Maandag uitgesaai is, fokus op vuurwapengeweld in Suid-Afrika.
"Ek sal hom vra om die waarheid te praat. Ek sal hom vra om vroue te respekteer," het Xingwana gesê.
"Ek sal hom vra om ontslae te raak van sy vuurwapens. Want ek glo as hy nie vuurwapens in sy huis gehad het nie, sou Reeva Steenkamp vandag gelewe het."
Xingwana se uitlatings is skerp gekritiseer.
"Hierdie minister het bo enige twyfel bewys dat sy nie geskik is om 'n amp te hê in 'n konstitusionele demokrasie nie," het Jan Bosman, sekretaris van die Afrikanerbond, in 'n verklaring aangevoer.
Ook AfriForum het Dinsdag gesê hy oorweeg dit om 'n klagte teen Xingwana by die gelykheidshof te lê oor haar uitlatings.
Isaac Mangena, MRK-woordvoerder, het gesê die kommissie het drie klagtes van mense ontvang wat meen Xingwana se woorde is rassisties en diskriminerend. Die MRK ondersoek die klagtes.
– Volg Nuus24 op Twitter.
- SAPA
