Minister se peperduur verblyf ontstel
2010-07-19 14:48
Johannesburg – Die studente-organisasie Sasco het Maandag hul ontevredenheid uitgespreek teenoor dr. Blade Nzimande, minister van hoër onderwys en opleiding.
Dít kom nadat hy glo belastingbetalers se geld gebruik het om in die Mount Nelson-hotel in Kaapstad oor te bly.
“In ‘n samelewing wat krioel met kras materialisme en verbruik word die minister se optrede as selfgesentreerd gesien,” het Mbulelo Mandlana, Sasco-voorsitter, in ‘n persverklaring gesê.
Die minister het na bewering verlede jaar vir 15 dae in die hotel oornag teen ‘n koste van sowat R40 000.
Mandlana het die minister aangemoedig om ‘n meer direkte benadering te neem tot kwessies wat later deur opportuniste uitgebuit kan word in die hoop om hulself ‘n voorsprong te gee in die politiek.
Sasco het ook The Star gekritiseer vir die wyse waarop hulle die storie aangebied het en dit as sensasie-gedrewe uitgemaak.
Volgens die departement se woordvoerder, Ranjeni Munusamy, moes die minister in die hotel oornag omdat die departement van publieke werke nie staatsverblyf vir hom beskikbaar gehad het nie.
Volg Nuus24 op Twitter.
- SAPA