Minister se lyfwag in hof
2011-10-25 17:54
Johannesburg – ‘n Man wat daarvan beskuldig word dat hy gesteel het terwyl hy as lyfwag gewerk het vir Nathi Mthethwa, minister van polisie, het Dinsdag in die Wynberg-landdroshof verskyn.
Rahidien Cullis, aanklaer, beweer sers. Ianval Suilung Isaacs (33) van Wellington het die minister se woning in Kaapstad binnegegaan en ‘n skootrekenaar en ‘n selfoon gesteel.
Daar word beweer dat Isaacs toe die twee items aan sy medebeskuldigdes, Amdat Hossain (42) en Mohammad Shahpul Islam (34), verkoop het.
Eric Ntabazaila, woordvoerder van die Nasionale Vervolgingsgesag (NVG), het gesê Isaacs sal aangekla word van huisbraak met die voorneme om te steel, diefstal, opsetlike saakbeskadiging en bedrog.
Luidens die klagstaat is al drie beskuldigdes op Dinsdag 6 September in hegtenis geneem en was hul eerste hofverskyning die volgende dag voor landdros M. van Eden in die Wynberg-landdroshof.
Isaacs is op borgtog van R1 000 vrygelaat en sy medebeskuldigdes op R400 elk.
Cullis het by Dinsdag se verhoor gesê die saak word steeds ondersoek.
Volgens hom word verklarings van getuies en vingerafdrukke nog verlang.
Hy het gesê al die partye het daartoe ingestem dat die saak tot 9 Desember uitgestel word.
- Volg Nuus24 op Twitter
- SAPA