Minister op pad na De Doorns
2012-11-13 16:02
Fotogalery - Staking kring uit
klik op klein foto bo om groter prentjie te sien
Kaapstad – Tina Joemat-Pettersson, minister van landbou, was teen Dinsdagmiddag op pad na die Hexriviervallei in die Wes-Kaap om stakende plaaswerkers in die gebied toe te spreek.
Palesa Mokomele, woordvoerder vir minister Joemat-Pettersson, het gesê sy sal 'n vergadering agter geslote deure met verteenwoordigers van plaaswerkers in Worcester hê, en sal van daar af aanbeweeg na die Stofland- informele nedersetting in De Doorns om plaaswerkers toe te spreek.
Werkers betoog sedert verlede week oor hul werksomstandighede en betaling. Hulle eis betaling van R150 per dag.
Baie werkers is volgens berigte gedwing om by die staking aan te sluit.
Minstens 10 mense is Maandag in die gebied in hegtenis geneem vir openbare geweld.
Intussen het Eyewitness News berig dat die staking na ander dele van die Wes-Kaap versprei het, en Touwsrivier en Ceres ook getref het.
"Dinsdagoggend het groepe mense op naburige plase in die Ceres-gebied byeengekom. Die polisie monitor die situasie," het André Traut, polisiewoordvoerder, gesê.
– Volg Nuus24 op Twitter.
- SAPA
